జార్ఖండ్ పబ్లిక్ సర్వీస్ కమిషన్ (JPSC), స్టాఫ్ సెలక్షన్ కమిషన్ (JSSC) ఉద్యోగ నియామక పరీక్షల్లో అక్రమాలు జరిగాయంటూ విద్యార్థులు చేస్తున్న ఆందోళనలు తీవ్రతరమయ్యాయి. విద్యార్థుల సమస్యలపై జార్ఖండ్ ప్రభుత్వం, నిరసనకారుల ప్రతినిధి బృందం మధ్య శుక్రవారం తొలి విడత చర్చలు జరిగాయి. చర్చలు సానుకూల వాతావరణంలో జరిగినప్పటికీ.. ప్రధాన డిమాండ్లపై ఎలాంటి స్పష్టమైన నిర్ణయం వెలువడలేదు.
ముఖ్యంగా 14వ జేపీఎస్సీ పరీక్షను రద్దు చేయాలన్నది విద్యార్థుల ప్రధాన డిమాండ్గా ఉంది. పరీక్షల నిర్వహణలో అక్రమాలు, అవకతవకలపై ప్రభుత్వం స్పష్టమైన చర్యలు తీసుకోవాలని వారు కోరుతున్నారు. తమ డిమాండ్లన్నింటినీ నెరవేర్చే వరకు ఆందోళనను విరమించే ప్రసక్తే లేదని విద్యార్థుల ప్రతినిధులు తేల్చి చెప్పారు. దీంతో ప్రభుత్వం, విద్యార్థుల మధ్య తదుపరి చర్చలు కీలకంగా మారాయి.
ఆదివారం లోపు ప్రభుత్వం నుంచి స్పష్టమైన రాతపూర్వక హామీ రాకపోతే ఆగస్టు 10న జార్ఖండ్ అసెంబ్లీ వైపు భారీ నిరసన ప్రదర్శన నిర్వహిస్తామని విద్యార్థులు హెచ్చరించారు. ఇప్పటికే ఆందోళనలు ఉధృతమవుతున్న నేపథ్యంలో ప్రభుత్వం ఎలాంటి నిర్ణయం తీసుకుంటుందనే దానిపై ఉత్కంఠ నెలకొంది. విద్యార్థుల డిమాండ్లపై ప్రభుత్వం సానుకూలంగా స్పందించి సమస్యను పరిష్కరిస్తుందా.. లేక నిరసనలు మరింత తీవ్రరూపం దాల్చుతాయా అనేది చూడాల్సి ఉంది.
