పశ్చిమాసియా యుద్ధం నేపథ్యంలో గాజాలో శాంతి పునరుద్ధరణకు అమెరికా అధ్యక్షుడు డొనాల్డ్ ట్రంప్ నేతృత్వంలోని ‘బోర్డ్ ఆఫ్ పీస్’ రూపొందించిన ఒప్పందంపై ఇజ్రాయెల్ ప్రధాని బెంజమిన్ నెతన్యాహు అసంతృప్తి వ్యక్తం చేసినట్లు తెలుస్తోంది. ఈ పరిణామం అమెరికా, ఇజ్రాయెల్ మధ్య మరోసారి విభేదాలు తెరపైకి వచ్చినట్లు అంతర్జాతీయ దౌత్య వర్గాల్లో చర్చకు దారితీసింది.
గాజాలో శాశ్వత శాంతి నెలకొనాలంటే హమాస్ పూర్తిగా ఆయుధాలను విడిచిపెట్టాల్సిందేనని నెతన్యాహు స్పష్టం చేసినట్లు సమాచారం. గతవారం అమెరికా-హమాస్ మధ్య కుదిరినట్లు పేర్కొంటున్న శాంతి ఒప్పందంలోని పలు అంశాలపై తనకు, ట్రంప్కు మధ్య స్పష్టమైన అభిప్రాయ భేదాలు ఉన్నాయని నెతన్యాహు బహిరంగంగానే వెల్లడించినట్లు తెలుస్తోంది.
ట్రంప్ ప్రభుత్వం గాజాలో శాంతి ప్రక్రియను ముందుకు తీసుకెళ్లేందుకు ప్రయత్నిస్తున్న సమయంలో నెతన్యాహు కఠిన వైఖరి కొత్త సవాళ్లకు దారితీసే అవకాశం ఉంది. ముఖ్యంగా హమాస్ నిరాయుధీకరణ అంశంపై ఇజ్రాయెల్ పట్టుదలగా ఉండటంతో శాంతి ఒప్పందం అమలుపై అనిశ్చితి నెలకొంది. దీంతో అమెరికా-ఇజ్రాయెల్ సంబంధాలపై కూడా ఈ పరిణామాల ప్రభావం పడే అవకాశం ఉందని అంతర్జాతీయ వర్గాలు భావిస్తున్నాయి.
