ఆంధ్రప్రదేశ్ మున్సిపల్ ఎన్నికల నగారా మోగిన నేపథ్యంలో ఎన్డీయే కూటమి భాగస్వామ్య పక్షాలైన తెలుగుదేశం, జనసేన, బీజేపీల మధ్య సీట్ల సర్దుబాటు ప్రక్రియ పూర్తయింది. రాష్ట్రంలోని మొత్తం 123 పట్టణ స్థానిక సంస్థలకు గాను పార్టీలవారీగా పంపకాలు ఖరారయ్యాయి. ఈ ఒప్పందం ప్రకారం అత్యధికంగా తెలుగుదేశం పార్టీ 85 స్థానాల్లో, జనసేన పార్టీ 29 స్థానాల్లో, భారతీయ జనతా పార్టీ 9 స్థానాల్లో పోటీ చేయనున్నట్లు అధికారిక జాబితా ద్వారా స్పష్టమైంది.
మొత్తం 17 మున్సిపల్ కార్పొరేషన్లలో తెలుగుదేశం పార్టీ అత్యధికంగా 11 కార్పొరేషన్లను దక్కించుకుంది. గ్రేటర్ విశాఖపట్నం, విజయనగరం, మచిలీపట్నం, మంగళగిరి-తాడేపల్లి, గుంటూరు, ఒంగోలు, నెల్లూరు, కడప, కర్నూలు, తిరుపతి, చిత్తూరు కార్పొరేషన్లలో టీడీపీ బరిలో నిలవనుంది. ఇక జనసేన పార్టీకి శ్రీకాకుళం, కాకినాడ, ఏలూరు, విజయవాడ వంటి 4 కీలక కార్పొరేషన్లు దక్కగా, బీజేపీకి రాజమహేంద్రవరం, అనంతపురం కార్పొరేషన్లు కేటాయించబడ్డాయి.
రాష్ట్రంలోని 106 మున్సిపాలిటీలు, నగర పంచాయతీల విభాగంలోనూ ప్రధాన వాటా టీడీపీకే దక్కింది. ఇందులో టీడీపీ 74 స్థానాల్లో పోటీ చేస్తుండగా, జనసేనకు 25 స్థానాలు, బీజేపీకి 7 స్థానాలు కేటాయించారు. ఇచ్చాపురం, పలాస-కాశీబుగ్గ, ఆముదాలవలస, పార్వతీపురం, బొబ్బిలి వంటి స్థానాల్లో టీడీపీ పోటీ చేస్తుండగా.. రాజాం, పాలకొండ, సాలూరులలో జనసేన, నెల్లిమర్ల, యలమంచిలిలలో బీజేపీ అభ్యర్థులు బరిలోకి దిగనున్నారు. కూటమిలోని మూడు పార్టీలు పరస్పర సమన్వయంతో ఉమ్మడి విజయం సాధించేలా ప్రచార వ్యూహాలను సిద్ధం చేస్తున్నాయి.
