భారతీయ రిజర్వ్ బ్యాంక్ (RBI) ద్రవ్య విధాన కమిటీ (MPC) సమావేశం ఆగస్టు 3 నుంచి 5 వరకు జరగనుంది. ఈ సమావేశంలో రెపో రేటుతో పాటు దేశ ఆర్థిక పరిస్థితికి సంబంధించిన పలు కీలక అంశాలపై నిర్ణయాలు తీసుకోనున్నారు. అయితే ఈసారి రెపో రేటులో ఎలాంటి మార్పు చేయకుండా యథాతథంగా కొనసాగించే అవకాశం ఉందని పలువురు ఆర్థిక నిపుణులు అంచనా వేస్తున్నారు.
ప్రస్తుతం ద్రవ్యోల్బణం పెరిగే అవకాశాలు ఉండటమే ఇందుకు ప్రధాన కారణంగా కనిపిస్తోంది. అంతర్జాతీయ మార్కెట్లో ముడి చమురు ధరల పెరుగుదల, పశ్చిమాసియాలో కొనసాగుతున్న ఉద్రిక్త పరిస్థితులు, ఈ ఏడాది రుతుపవనాలపై ఉన్న అనిశ్చితి వంటి అంశాలు ఆర్బీఐ నిర్ణయంపై ప్రభావం చూపే అవకాశం ఉంది. ఈ నేపథ్యంలో వెంటనే వడ్డీ రేట్లలో మార్పులు చేయకుండా పరిస్థితులను నిశితంగా పరిశీలించే అవకాశం ఉందని నిపుణులు చెబుతున్నారు.
ఈసారి ఆర్బీఐ ‘వెయిట్ అండ్ వాచ్’ విధానాన్ని అనుసరించే అవకాశాలు ఎక్కువగా ఉన్నాయని విశ్లేషకులు భావిస్తున్నారు. ద్రవ్యోల్బణం, ఆర్థిక వృద్ధి, అంతర్జాతీయ పరిణామాలను పరిశీలించిన తర్వాత తదుపరి సమావేశాల్లో వడ్డీ రేట్లపై నిర్ణయం తీసుకునే అవకాశం ఉంది. దీంతో ఆర్బీఐ తాజా నిర్ణయం రుణాలపై వడ్డీ రేట్లు, ద్రవ్యోల్బణం, దేశ ఆర్థిక వృద్ధిపై ఎలాంటి ప్రభావం చూపుతుందనే అంశంపై ఆసక్తి నెలకొంది.
