తెలంగాణ ముఖ్యమంత్రి రేవంత్ రెడ్డి కుటుంబంపై బీఆర్ఎస్ నేత మన్నె క్రిశాంక్ తీవ్ర ఆరోపణలు చేశారు. కాంగ్రెస్ ప్రభుత్వం అధికారంలోకి వచ్చిన ఈ రెండున్నరేళ్లలో సీఎం కుటుంబానికి సంబంధించిన వ్యాపారాలు అమాంతం విస్తరించాయని ఆయన ఆరోపించారు. హైదరాబాద్‌లోని తెలంగాణ భవన్‌లో ఏర్పాటు చేసిన మీడియా సమావేశంలో మాట్లాడుతూ ఆయన ఈ వ్యాఖ్యలు చేశారు.
ముఖ్యమంత్రి కుటుంబంతో సంబంధం ఉన్న మెడికవర్ హాస్పిటల్స్, మ్యాక్స్ బీఎన్ ఫార్మా, మైండ్ వాల్ కన్‌స్ట్రక్షన్స్, శోదా కన్‌స్ట్రక్షన్స్, స్వచ్ బయో, టెసరాక్ట్ అడ్వాన్స్‌డ్ సిస్టమ్స్ వంటి సంస్థలు వేగంగా అభివృద్ధి చెందాయని క్రిశాంక్ ఆరోపించారు. ఈ కంపెనీలు భారీ అవకతవకలకు పాల్పడుతున్నాయని, దీనికి సంబంధించిన పత్రాలను ఈడీ, కాంగ్రెస్ జాతీయ అధ్యక్షుడు మల్లికార్జున ఖర్గే, ప్రధాని కార్యాలయం, రాష్ట్రపతి కార్యాలయాలతో పాటు ప్రతిపక్ష నేతలకూ అందజేస్తానని తెలిపారు.
ఈ ఆరోపణలపై విచారణకు ముఖ్యమంత్రి ఆదేశించాలని క్రిశాంక్ డిమాండ్ చేశారు. కొన్ని కంపెనీలలో దుంప శిరీష డైరెక్టర్‌గా ఉండటం వెనుక ఉన్న పాత్రను కూడా తేల్చాలన్నారు. తన ఆరోపణలు అవాస్తవమని తేలితే, మరోసారి ప్రెస్ మీట్ పెట్టి రేవంత్ రెడ్డి కుటుంబానికి బహిరంగ క్షమాపణ చెబుతానని స్పష్టం చేశారు.
ఇలాంటి అంశాలను ప్రస్తావిస్తున్నందుకే తనను రెండుసార్లు జైలుకు పంపారని, తన ఇంటి తలుపులు పగలగొట్టారని, తన బిడ్డను కూడా బెదిరించారని క్రిశాంక్ ఆవేదన వ్యక్తం చేశారు. కాగా, తెలంగాణలో అధికార కాంగ్రెస్, ప్రతిపక్ష బీఆర్ఎస్ మధ్య ఆస్తులు, భూముల విషయంలో ఆరోపణలు, ప్రత్యారోపణలు కొనసాగుతున్న నేపథ్యంలో క్రిశాంక్ వ్యాఖ్యలు ప్రాధాన్యం సంతరించుకున్నాయి.
