తమిళనాడు రాజకీయాలు ఉత్కంఠభరితంగా మారాయి. రాష్ట్రంలో కొత్త ప్రభుత్వ ఏర్పాటుకు కీలకంగా మారిన అన్నాడీఎంకేలో అనూహ్య పరిణామం చోటుచేసుకుంది. నేడు చెన్నైలో జరగాల్సిన ఆ పార్టీ ఎమ్మెల్యేల సమావేశం అకస్మాత్తుగా రద్దయింది. టీవీకేకు మద్దతిచ్చే అంశంపై పార్టీలో తీవ్రస్థాయిలో భిన్నాభిప్రాయాలు వ్యక్తమవుతున్న తరుణంలో ఈ పరిణామం జరగడం ప్రాధాన్యం సంతరించుకుంది.
ఇటీవల జరిగిన తమిళనాడు అసెంబ్లీ ఎన్నికల్లో హంగ్ ఏర్పడిన సంగతి తెలిసిందే. నటుడు విజయ్ నేతృత్వంలోని తమిళగ వెట్రి కళగం (టీవీకే) 108 స్థానాలతో అతిపెద్ద పార్టీగా అవతరించింది. అయితే, ప్రభుత్వ ఏర్పాటుకు అవసరమైన 118 మంది సభ్యుల మ్యాజిక్ ఫిగర్కు దూరంగా నిలిచింది. ఈ నేపథ్యంలో 47 మంది ఎమ్మెల్యేలున్న అన్నాడీఎంకే మద్దతు కీలకంగా మారింది.
టీవీకేకు బయటి నుంచి మద్దతు ఇచ్చే విషయంపై అన్నాడీఎంకేలో అంతర్గత చర్చ జరుగుతున్నట్లు తెలుస్తోంది. కొందరు ఎమ్మెల్యేలు మద్దతు ఇవ్వాలని పట్టుబడుతుండగా, పార్టీలోని సీనియర్లు, మరికొందరు దానిని వ్యతిరేకిస్తున్నట్లు సమాచారం. ఈ తీవ్రమైన భిన్నాభిప్రాయాల కారణంగానే పార్టీ అధినేత పళనిస్వామి సమావేశాన్ని రద్దు చేసినట్లు రాజకీయ వర్గాల్లో ప్రచారం జరుగుతోంది. సమావేశం రద్దుపై పార్టీ అధికారికంగా ఎలాంటి కారణం చెప్పకపోవడంతో, తదుపరి ఏం జరగనుందనే దానిపై సర్వత్రా ఆసక్తి నెలకొంది.
